A Xunta de Goberno da Deputación de Lugo aprobou este venres a ampliación do prazo de inscrición no plan de emprego xuvenil ‘Prende! Bota raíces no rural’. Deste xeito, as solicitudes poderanse enviar ata o vindeiro 20 de xaneiro.
A voceira provincial socialista, Pilar García Porto, explicou que esta decisión partía do feito de que o período previsto inicialmente coincidía coas datas de Nadal. Así, agardan que máis mozas e mozos poidan formalizar as súas solicitudes para participar nun programa que pretende fomentar o emprego da xuventude e fixar poboación no medio rural.
O proxecto está dirixido á rapazada de entre 16 e 30 anos que cumpra os seguintes requisitos: estar en situación de desemprego e estar anotado no Sistema Nacional de Garantía Xuvenil; non ser estudante; e estar empadroado nalgún dos 58 concellos lucenses que participan no programa. De entre todas as solicitudes, serán seleccionadas un total de 60 persoas que poderán desfrutar dun período de formación e outro de experiencia laboral.
Os sectores nos que se traballará serán o das enerxías renovables (que se impartirá na Mariña); hostalería e turismo (Ribeira Sacra); xestión forestal (A Montaña); e agricultura e gandería (zona centro). Por cada xornada de formación de cinco horas o participante recibirá 14 euros e a Deputación entregará un diploma de asistencia ao remate desta fase.
Na etapa de experiencia laboral, a Deputación concederá axudas a empresas deses sectores para que contraten durante oito meses os mozos e mozas que recibiron a formación. Á súa vez, as traballadoras e traballadores percibirán como mínimo 900€ ao mes. Ademais, a aqueles participantes no programa que decidan emprender, concederáselles unha axuda de 5.510€.
As persoas interesadas poden inscribirse de forma presencial no Pazo de San Marcos ou a através da sede electrónica.
FOMENTO DA CONTRATACIÓN INDEFINIDA
Por outra parte, Pilar García Porto tamén anunciou unha modificación no programa Ilumin@ co obxectivo de fomentar a contratación indefinida nas empresas enerxéticas. Así, as empresas licitadoras que conten con máis contratos indefinidos entre o seu cadro de persoal terán maior puntuación.
O programa Ilumin@ supoñerá a renovación de preto de 3.200 puntos de luz nos 38 concellos lucenses que decidiron sumarse. Co plan prevese unha redución do consumo en máis de 450.000 quilovatios ao ano, o que, en termos económicos, implica un total de 62.000€.
