A portavoz nacional do BNG, Ana Pontón, tachou de “cazaría política” do PP contra o alcalde nacionalista da localidade lucense de Muras por “plantarlle cara ás eléctricas” e “defender os intereses dos veciños”.
Nun acto este mércores en Ames, a líder do Bloque lamentou que o PP “non pode soportar” que mentres a Xunta “se pon ao lado das eléctricas e das macrocelulosas contaminantes”, o BNG “ponse ao lado da cidadanía”, como fai, defendeu, o alcalde de Muras.
Así, tras a denuncia do PP contra o rexedor por contratos de asesoramento xurídico para o Concello con empresas vinculadas ao Bloque por encima do limiar dos contratos menores, Pontón esgrimiu que se trata de “unha persecución” e un “intento de desprestixio” contra o BNG e o alcalde.
En opinión de Pontón, o PP “xa non engana a ninguén” e esta cuestión “deixa ao descuberto as vergoñas do goberno de Rueda” que, apuntou, “pon ao lobby eléctrico por diante de Galicia”.
“Muras é o concello de máis eólicos do país e, por moito que lle moleste ao Partido Popular, o BNG vai seguir defendendo en Muras e en toda Galicia os intereses xerais fronte ás eléctricas”, manifestou.
Nesta liña, a portavoz nacionalista advertiu de que non os van “a parar” nin a “calar” co que definiu como “campañas difamatorias” e “cazarías políticas”. “Imos seguir plantándolle cara ás eléctricas”, resolveu.
