O presidente da Deputación de Lugo, José Tomé, destacou que o Centro de Innovación Territorial vertebrará as políticas provinciais relacionadas co reto demográfico. Así o expuxo en Ponferrada onde se celebrou o encontro ‘Cambio climático, reto demográfico e mundo rural’, organizado no marco da Convención por un Pacto de Estado fronte á Emerxencia Climática.
Na xornada, presidida pola vicepresidenta terceira e ministra para a Transición Ecolóxica e o Reto Demográfico, Sara Aagesen, tamén participaron os ministros Fernando Grande-Marlaska, Luís Planas e Diana Morant. Tamén o presidente da Deputación de León, Gerardo Álvarez Courel. Tomé sinalou en Ponferrada que o obxectivo é que o CIT actúe como “plataforma de sinerxías, integrando iniciativas en marcha, como a rede de residencias, o Plan de Cooperación cos concellos ou a Granxa Gayoso, dándolles unha visión común”.
Noutra orde de cousas, o presidente da Deputación de Lugo e o alcalde de Pontenova, Darío Campos Conde, asinaron un convenio de colaboración mediante no que a institución provincial realizou unha achega económica de 137.151 euros a este municipio para acondicionar a rede viaria da parroquia de Santa María de Conforto.
