O alcalde de Lugo, o socialista Miguel Fernández, avanza este luns que a substitución do concelleiro Pablo Permuy, falecido o pasado xoves tras unha longa enfermidade, farase no pleno de finais de outubro, pero non quixo matizar detalles sobre a mesma. “A situación sobrevinda é moi recente e non hai prema para tomar decisións”, avanzou Fernández, quen pide “calma” e ve a substitución como “claramente normalizada”.
Por orde de lista, accedería ao Consistorio María Reigosa, enxeñeira de Costas, “pero aínda se están tendo as conversacións necesarias coas partes interesadas para ver se segue manifestando o mesmo interese que cando se integrou na lista electoral”, engade. O alcalde insiste en que “non hai présa ningunha” por facer efectivo o cambio, xa que falta aínda un mes, e recalca que “hai que respectar a esta persoa e as súas decisións”. O que si avanzou o alcalde é que podería modificarse a repartición de áreas debido a que se incorpora unha persoa “con perfís profesionais e técnicos moi diferentes” pero insistiu en que eses cambios “se sopesarán” e comunicaranse cando se decidan.
