Os deputados do PP lucense Jaime De Olano, Francisco Conde e Cristina Abades esixiron ao Goberno central explicacións sobre os “constantes incidentes” na liña ferroviaria Lugo-Ourense que evidencian “o agravamento da provincia en materia de comunicacións”. Segundo trasladou o partido político nunha nota de prensa, estas “deficiencias non son admisibles”, polo que reclamaron “solucionar as causas que motivan os habituais incidentes” que “dificultan a mobilidade dos lucenses e lastran o desenvolvemento e a competitividade da provincia”.
Nesta liña, os populares advertiron que “por desgraza, o extraordinario é que o servizo se produza sen ningún sobresalto”, porque os “atrasos, utilización de medios alternativos e a supresión de servizos son circunstancias habituais para os lucenses e visitantes da provincia”. A isto súmase que nalgunhas localidades de interese turístico o número de usuarios increméntase no verán. É o caso de Sarria onde chegan moitos peregrinos para empezar o Camiño Francés.
Con respecto a esta localidade, os populares lembraron que un dos últimos incidentes foi a supresión do servizo entre Lugo e Ourense na tarde do pasado domingo. “Estaba prevista a parada en Sarria, pero non realizou o traxecto deixando aos usuarios abandonados e, o que é peor, sen ningún tipo de información nin por parte de Renfe nin por parte de Adif que deberían ofrecer desculpas aos usuarios e ofrecer algún tipo de compensación aos afectados”, denunciaron.
