A deputada do Bloque Nacionalista Galego (BNG) no Parlamento galego Olalla Rodil solicitou á Xunta que actúe “con urxencia” tras o peche do Xulgado de Instrución número 4 de Lugo polo risco de novos derrubamentos. Nun comunicado, a parlamentaria autonómica insistiu na necesidade de que Lugo conte con infraestruturas xudiciais “á altura das necesidades e dos dereitos da súa poboación” e asegurou que “non se pode permitir que se vexan afectados os servizos públicos polo mal estado das instalacións”.
Así mesmo, Rodil sostivo que a deterioración do edificio xudicial non é un feito illado, senón unha situación recorrente que leva anos sendo denunciada polos profesionais do ámbito da xustiza. Estas declaracións chegan despois de que o pasado domingo, sobre as 20.00 horas, se derrubase unha parte do teito da oficina do Xulgado do Social número 4, o despacho da maxistrada e o da oficina do Xulgado do Social número 2.
Ademais, os teitos da planta baixa tamén ameazan con desprendementos, concretamente onde se sitúan as zonas comúns de acceso á oficina do Xulgado Decano e a Oficina de Atención ao Cidadán, segundo as primeiras estimacións. Por iso, a deputada insistiu en que a cidade necesita un “plan serio de mantemento e renovación das súas infraestruturas xudiciais, que leve asegurada unha planificación a longo prazo” e un “investimento real”.
RECLAMACIÓN DO SINDICATO CSIF
Por outra banda, a Central Sindical Independente e de Funcionarios (CSIF) reclamou medidas inmediatas para solucionar os problemas de seguridade no Xulgado e subliñou que “a prevención de riscos non é un xogo”. Mediante unha nota de prensa, CSIF Xustiza denunciou que esta situación era “plenamente coñecida” desde fai máis dun ano e aínda non hai unha data para realizar as obras.
Ademais, o sindicato afirmou que o 9 de febreiro de 2023 alertou no Comité de Seguridade e Saúde Laboral das filtracións, unha advertencia que reiterou nun escrito presentado o 31 de xaneiro de 2025, cando un falso teito caeu sobre a mesa dunha funcionaria. Neste sentido, asegurou que “a pesar da gravidade dos feitos” non se adoptaron medidas “efectivas” e continuaron expondo a diario ao persoal e á cidadanía a un “perigo inaceptable”. Con motivo da celebración do Día Mundial da Seguridade e Saúde no Traballo este domingo 28 de abril, o sindicato puxo en marcha unha campaña que lembra que “se incumpres a prevención es responsable”.
