A Xunta autorizou ao Concello de Lugo a trasladar os 96 exemplares de mexillón que se atopan na zona onde prevén instalar unha rampla ao río Miño e que se verían afectados por esta pasarela. Con todo, tamén esixiu que se realicen “dúas comprobacións sucesivas” pasadas 48 e 72 horas da extracción dos moluscos.
Segundo denunciou o goberno local lucense nunha nota de prensa, estes novos requisitos “non evidencian” a colaboración ofrecida pola Xunta, nin tampouco “o compromiso e celeridade” da que se falou.
Por outra banda, a alcaldesa de Lugo, Paula Alvarellos, lembrou que a administración autonómica “dispón” da solicitude de traslocación dos moluscos “desde inicios da semana”, pero comunicou este venres esta resolución que “suporá novos atrasos”.
Nesta liña, a rexedora lamentou que este proceso administrativo “podería resolverse en horas”, pero pola contra, levan “case unha semana de espera”.
Deste xeito, Alvarellos instou este venres ao Goberno galego a “cumprir” con ese “compromiso e celeridade” que a directora xeral de Patrimonio Natural “adquiriu” con ela nunha reunión celebrada no mes de xullo.
“Estes novos condicionantes, despois de ter este trámite paralizado durante cinco días, non parecen un xesto da cooperación que verbalmente nos brindaron, e redunda na discriminación á que durante tantos anos a Xunta leva sometendo á cidadanía lucense, ao impedirnos pór os medios para que os veciños poidan acceder comodamente ao río para gozar dun baño no Miño”, esgrimiu a alcaldesa.
Con todo, o Concello lucense xa comunicou ao Goberno galego a súa intención de realizar a traslocación o vindeiro luns 26 de agosto. Ademais, o goberno local incidiu en que trasladar os mexillóns a un punto próximo e habilitar a rampla son tarefas que poden facerse en “moi pouco tempo” e “con todas as garantías”, polo que reiterou que é “preciso” que a Xunta “cumpra a súa palabra”.
