A presidenta do PP de Lugo, Elena Candia, e os senadores populares José Manuel Barreiro, José Manuel Balseiro e Juan Serrano, acompañados doutros cargos do partido, reclamaron este luns desde a estación de tren da capital lucense a chegada do AVE e dos Avril á provincia e denunciaron o “agravio” que supón que Lugo sexa “a única provincia de Galicia” sen estes trens.
Nunha nota de prensa, o PP destacou que para que cheguen estes servizos á provincia é “imprescindible” a construción das variantes dos Peares-Canaval e Rubián, así como acometer melloras no trazado que permitan a circulación a alta velocidade no novo material rodante. Así, expuxeron que os proxectos destas variantes xa foran presentados polo exministro Íñigo da Serna e desde o PSOE “o único que fixeron foi anulalos” o que, na súa opinión, “condena á provincia a quedar fóra do AVE”.
Por iso, os populares lucenses chaman a atención sobre o “illamento” ao que consideran que o Executivo de Pedro Sánchez somete á provincia en materia de infraestruturas de comunicación. “Os lucenses non estamos en igualdade de condicións co resto de galegos, como as nosas empresas tampouco poden competir en igualdade de condicións”, sinalaron.
