O edil de Dinamización Económica, Mauricio Repetto, recibiu este sábado en nome do Concello de Lugo a insignia de honra outorgada pola Confraría do Bo Xesús, nun acto para conmemorar o 75 aniversario da irmandade. Este recoñecemento, entregado en virtude do compromiso e apoio prestado pola cidade de Lugo a esta entidade desde mediados do século XX, simboliza a colaboración entre a Administración local e a irmandade, apuntan desde o consistorio.

“Sen dúbida, a rica tradición e o incalculable labor que a Confraría desempeña na divulgación e conservación do patrimonio histórico e artístico da nosa cidade son dignas de admiración. A súa dedicación contribúe significativamente a preservar as raíces culturais que dan forma á identidade de Lugo e que, co paso dos anos, tórnanse máis valiosas se cabe”, dixo Repetto tras o acto. O concelleiro agradeceu a contribución das persoas confrades na difusión da imaxe da cidade e “o compromiso constante da confraría coa difusión da historia e a promoción” do patrimonio lucense.