O PP cualificou de “lavado de cara” os 14,7 millóns aprobados polo Goberno para investir no mantemento da autovía A-6 e da nacional N-V ao seu paso pola montaña de Lugo, unha partida que os populares consideran que é “o 10 % do que necesita a autovía”. Este sábado, deputados, senadores e alcaldes da zona xunto á presidenta provincial do PP lugués, Elena Candia, visitaron a vía ao seu paso polo municipio de Baralla para acusar ao PSOE de tratar Lugo como “a cincenta de España”, o que atribúen aos resultados electorais do PSOE na provincia.
“Isto non é un tema político por moito que o PSOE demostre que só lle interesa falar da A-6 cando hai eleccións. Isto é un tema de seguridade viaria, de competitividade das nosas empresas e de accesibilidade a Galicia”, sinalou o deputado no Congreso Francisco Conde en declaracións difundidas polo PP. Os populares estiman que o investimento que necesita a A-6 para liquidar os problemas ascende a 140 millóns de euros, co que os 14,7 millóns de euros anunciados esta semana pola Administración central son “insuficientes” e, din, só permitirán levar a cabo un “lavado de cara”.
Así o manifestou a deputada autonómica electa por Lugo e máxima responsable do partido na provincia, Elena Candia, que incidiu en que a partida “se reduce aínda máis se temos en conta que é unha partida plurianual, o que leva que as a obras se dilaten polo menos tres anos”. Deste xeito, instou ao Goberno a “que deixe de tratar a esta provincia e a Galicia como a cincenta de España porque o pasado día 18 quedou demostrado que os lucenses e os galegos apostamos polo que realmente funciona”, en alusión ás eleccións galegas nas que o PP renovou a súa maioría absoluta en Galicia.
Tamén participou na visita o senador José Manuel Barreiro, que cargou contra o Executivo que preside Pedro Sánchez por levar “ao Ministerio de Transportes aos peores momentos da súa historia”. Nesta liña sinalou que a xestión dos socialistas resúmense en “trens que non collen polos túneles, viadutos que caen, trens que non chegan” e “tamén dunha clamorosa desatención do deber de conservación das estradas”.
Todo isto, continuou o exportavoz popular na Cámara alta, “tutelado por un departamento que está a ser moi cuestionado e está a ser noticia non precisamente pola súa eficacia na xestión das infraestruturas”. Así as cousas, o PP reclamou “sensatez” ao Goberno central e avanzaron que levarán estas demandas vinculadas á A-6 á Cortes para que se adopten investimentos que renoven a capa de rodaxe na autovía, unha infraestrutura “esencial” para a comunidade.
