A presidenta do PP de Lugo e candidata na capital lucense nas eleccións do próximo 28 de maio, Elena Candia, rexistrou este venres a renuncia á súa acta de concelleira no Concello de Mondoñedo. Tras o rexistro da renuncia, a previsión é que esta sexa aprobada no pleno previsto para o vindeiro venres na localidade lucense, na que Candia iniciou a súa carreira política.

Nela foi alcaldesa, cargo que deixou no seu día para optar a unha acta no Parlamento de Galicia, ao que accedeu tras a última vitoria electoral de Alberto Núñez Feijóo e en cuxo órgano reitor –a Mesa– ocupa a Vicepresidencia Primeira.

Centrada na política municipal lucense desde meses atrás e ás portas de que se formalice a convocatoria electoral para os comicios de maio, Candia decidiu dar o paso definitivo de desvincularse do Concello de Mondoñedo, onde deixará de ser concelleira esta semana.