O número dous do PSOE galego e alcaldesa de Lugo, Lara Méndez, eloxiou ao presidente do Goberno, Pedro Sánchez, polos compromisos adquiridos durante o debate sobre o Estado da Nación, ao que observou “en modo presidente, pensando na cidadanía, nas persoas, pero pensando sobre todo, nos máis vulnerables”.
“Viuse como se poden articular medidas que contribúan a redistribuír o diñeiro e que se atenda sobre todo ás familias, ás familias máis vulnerables e a aqueles que lles custa chegar a fin de mes”, destacou.
A vicesecretaria xeral do PSdeG insistiu en que viu ao presidente Sánchez “atendendo ás necesidades, como xa leva facendo ao longo do seu mandato”. Enxalza ese compromiso coas “políticas sociais” que sairán fortalecidas, logo das medidas lanzadas este martes polo xefe do Executivo central.
E iso a pesar dunha lexislatura, que interpretou, que se traduce nunha “situación moi difícil e moi complexa, non hai que descontextualizar, nin obviar que momento tan difícil estamos a vivir, primeiro a través da pandemia e agora coa guerra en Ucraína”.
“NON HAI VARITA MÁXICA”
Lara Méndez esgrimiu a “problemática mundial, que se vive en todo o mundo, e téñense que pór medidas en función de como vai evolucionando”.
“Non hai un remedio máxico, senón aplicariámolo todos. Trátase de implementar medidas que axuden a que a xente poida chegar a fin de mes e que non teñamos traballadores pobres. Eu vin ao presidente Sánchez atendendo esas necesidades”, resaltou, finalmente, sobre a súa intervención.
