A Consellería de Cultura, Educación e Universidade apercibiu o pasado mes de xaneiro a directora do CEIP San Xoán de Becerreá tras confirmar que se repartiron máscaras e elementos de hixiene contra a COVID-19 co logotipo do partido político ‘Galicia Sempre’, fundado polo exsocialista Manuel Martínez e alcalde deste municipio lucense.
Así o explicou en comisión parlamentaria o secretario xeral técnico da Consellería, Manuel Vila, en resposta a unha pregunta formulada polo deputado socialista Luís Álvarez.
O parlamentario reclamou explicacións por esta situación “deplorable” e de auténtica “propaganda” no propio centro, ao que está vinculado o propio alcalde, ademais de por a actuación do Goberno galego para solucionar o problema.
O servizo de inspección tivo coñecemento dos feitos o 11 de xaneiro, tras a denuncia telefónica formulada polo portavoz socialista no municipio.
A repartición entre o alumnado realizouse o venres, á volta das vacacións de Nadal, e consistiu nun ‘kit’ composto por máscara, toallitas e xel hidroalcohólico, todos eles coa simboloxía da formación fundada polo rexedor municipal.
Please wait while you are redirected...or Click Here if you do not want to wait.
