EFE | A portavoz socialista no municipio de Becerreá, Isabel Rubinos, denunciou que o alcalde da localidade e antigo compañeiro no PSdeG-PSOE, Manuel Martínez, repartiu no colexio da localidade material para a prevención da Covid-19 co logotipo do seu partido político (Galicia Sempre).
A voceira socialista avanzou que a súa formación levará o sucedido ao Parlamento de Galicia para que a Consellería de Educación “clarifique esta anómala situación”, que cualificou como un “auténtico escándalo e dunha actitude inaceptable por parte do alcalde de Becerreá e de todo o seu goberno”.
Segundo explicou o Partido Socialista, ademais doutro tipo de material, o alcalde entregou no CEIP San Xoán de Becerreá máscaras e frascos de xel hidroalcohólico coa simboloxía do seu partido político”. Rubinos afirma que se trata dunha forma de actuar “caciquil”, que “mostra a cara máis sectaria do goberno de Manuel Martínez”, que busca “adoutrinar aos máis mozos do municipio”.
“Se o Concello de Becerreá ten que achegar material aos alumnos, que o faga. Estamos de acordo. Pero non podemos consentir nin compartir que se reparta este material coa simboloxía dun partido político, porque os impostos pagámolos todos”, concluíu
