O presidente da Deputación de Lugo, o socialista José Tomé, emprazou á dirección de Alcoa a que devolva “o diñeiro que recibiu” en formas de axudas públicas dado que “non cumpriu”, ao situar ás portas dun posible peche á factoría de San Cibrao.
Antes do pleno provincial deste martes, Tomé destacou que “a Deputación deu as liñas polas que se debía de traballar desde o primeiro momento que era, xustamente, mirar cara a Alcoa e non mirar para outros sitios como pedían algúns”, “E agora resulta que tiñamos razón e a quen había que esixirlle era a Alcoa porque non cumprira os seus compromisos, nin de emprego, nin de manter as instalacións a pesar de recibir moitos fondos públicos”, reprochou.
“Se se empeñan en marchar, que se vaian, pero o que non pode ser é pechar e que lle salga gratis. Por tanto, terá que devolver o diñeiro que recibiu dado que non cumpriu”, subliñou.
En canto ao “Estado” ou “Goberno”, apuntou que “ten que mirar todas as posibilidades de que esa empresa non peche a través de mecanismos xurídicos”. “Ten que actuar para evitar o peche desta empresa e que siga habendo produción en España (de aluminio)”, reivindicou.
A continuación lembrou que foi “o Goberno de España o único que puxo solucións encima da mesa cando outros parecían que se apoiaban na pretensión da empresa, o que achegou unha solución dun socio comprador para facer viable a produción de aluminio na costa e manter o emprego ese foi o goberno (central)”.
BNG E PP
Por parte do BNG, socios de goberno dos socialistas na Deputación de Lugo, o seu portavoz, Efrén Castro, apelou á “necesidade de que haxa vontade política por parte da Xunta e por parte do Goberno do Estado para nacionalizar unha empresa“. “Hai diñeiro, hai mecanismos administrativos polo que se podería facer e deixar de permitir que Alcoa se ría de Galicia, do estado español e de todos os traballadores”, defendeu.
O portavoz provincial do PP e ex alcalde de Foz, Javier Castiñeira, recoñeceu que se está “nun momento clave, nun momento moi complexo e quizais no peor momento nos 40 anos de existencia de Alcoa”. “E é moi preocupante para A Mariña e moi preocupante para a provincia de Lugo”, afirmou. “O que queremos dar é unha imaxe de fortaleza política”, concluíu.
