A alcaldesa de Lugo, Lara Méndez, anunciou que o orzamento municipal do Concello para o próximo ano será elaborado “por primeira vez con perspectiva de xénero”.
Acompañada pola concelleira de Muller, Igualdade e Xuventude, Ana González Abelleira, a rexedora precisou que a planificación das contas municipais incorporará, “ademais dun informe de impacto de xénero”, unha “análise política do gasto municipal con indicadores e medidas a aplicar” para unha distribución equitativa do gasto municipal que favoreza a igualdade real entre homes e mulleres.
“Iniciaremos para iso un proceso complexo que require dunha implantación progresiva, que nos levará varios exercicios, pero temos a determinación de que os orzamentos de 2021 nazan baixo o amparo desta filosofía”, para “reforzar as políticas encamiñadas a conseguir unha igualdade real”, engadiu.
Nese sentido, insistiu no compromiso “firme” de Concello para fomentar a igualdade coa “ferramenta máis potente” da que dispón, que son “os orzamentos municipais”, porque “sinala as prioridades do goberno” e sostén a súa “capacidade para concretar políticas”.
