O líder estatal de Vox, Santiago Abascal, viaxou este venres a Lugo para participar nun mitin electoral de apoio á candidata lucense, Sonia Teijeiro, de cara ás eleccións autonómicas do 12-X. Antes do acto, decenas de persoas encheron a praza de Campo Castelo para proferir cánticos antifascistas.
“Fóra fascistas da nosa rúa”, “Agora e sempre, Lugo antifascista” ou “Lugo será a tumba do fascismo” foron algunhas das consignas proclamadas polos manifestantes. Entre este grupo de xente e aqueloutro —tamén numeroso— que acudía a escoitar os representantes de Vox, había unha ringleira de axentes de Policía. O propio partido fixera pública a súa petición de presenza policial no acto ao coñecer a convocatoria da concentración antifascista.
Nas primeiras intervencións de Sonia Teijeiro e mais de Jorge Buxade, eurodeputado, referíronse aos “piji-progres de Lugo” e aseguraron que a súa formación é a única que “sempre defenderá a liberdade de expresión”.
