EFE | O candidato de Marea Galeguista á presidencia da Xunta, Pancho Casal, avogou por establecer un tren de proximidade para Lugo, “a cidade que máis o necesita”.
“Interconectar o territorio” é “decisivo” para o futuro de Galicia, segundo Casal, que estivo acompañado na súa visita á estación de ferrocarril polo cabeza de lista de Marea Galeguista por Lugo, Iván R. Lombardero, e pola número dous da candidatura Carmen Núñez, entre outros integrantes da formación política.
En declaracións aos medios de comunicación, destacou que a sustentabilidade é o “eixo transversal en toda a oferta política da Marea Galeguista” e por iso evocou iniciativas sobre mobilidade, por ser “unha parte moi importante das emisións de gases de efecto invernadoiro”, causante do cambio climático. Lombardero dixo, nese sentido, que Lugo é “a gran abandonada” polo Goberno autonómico galego, presidido por Alberto Núñez Feijóo.
Nese punto, ambos coincidiron en destacar outro dos eixos da campaña de Marea Galeguista, o “soberanismo cidadán”, porque segundo explicou Casal, “fai trinta anos deberiamos poder decidir que o máis importante non era o AVE”, en alusión ao trazado ferroviario de alta velocidade entre Madrid e Galicia, que está a piques de ser completado. “Evidentemente, hai que ter unha boa conexión co resto do Estado e de Europa, pero o importante é interconectar o territorio”, engadiu Casal.
O líder de Marea Galeguista avogou por construír unha estación intermodal que permita “sacar a estación de autobuses do centro, que fai que todo o tráfico pesado estea a dar voltas pola rolda da Muralla”. A Marea Galeguista quere garantir á poboación que o Goberno autonómico “non mirará cara a Madrid, que mirará cara a Galicia, cara aos galegos e as galegas”, concluíu.
