O grupo municipal do Partido Popular en Lugo tacha de “chiringuito cultural” a Concellería de Cultura en mans do Bloque Nacionalista Galego, ao que acusan de “enchufar e financiar” empresas afíns ao partido. “En tan só cinco meses deste mandato do bipartito, disparáronse os pagos a unha Sociedade Cooperativa Galega cuxa responsable é a que foi a número 2 do BNG de Cerceda”, aseguran os populares.
O vicevoceiro popular Antonio Ameijide explica que “dende xaneiro de 2019 a setembro de 2019, esa compañía recibiu por diferentes traballos en Lugo 7.900 euros”, pero “sorpresivamente, tralo pacto do bipartito de Lugo, esa mesma entidade quintuplicou os seus beneficios pasando a ingresar 36.273 euros”.
As facturas das que falan fan referencia a un espectáculo de contacontos na biblioteca municipal, varias representacións teatrais e distintas actividades durante o Nadal. Para os populares, os datos que se extraen desas facturas revelan que os nacionalistas “tentan montar un chiringuito privado con cartos públicos para beneficiar a empresas, sociedades ou asociacións con carné nacionalista”.
Ameijide sostén, ademais, que o PSOE de Lugo é corresponsable da situación e pídenlle á alcaldesa, Lara Méndez, que deixe de ser “cómplice” de “toda esta cacicada”.
GASTO NO SAN FROILÁN
Ademais, os populares solicitarán o acceso aos expedientes para “clarificar a que se adicaron os case 300.000 euros que o BNG gastou de máis no San Froilán” para comprobar “se acabaron beneficiando a empresas da súa contorna”.
