O Partido Popular de Lugo denunciou este sábado que o catamarán rescatado do fondo do río Miño, que se afundiu á altura da ponte das Saamasas na noite do 19 ao 20 de decembro, “leva días deteriorándose, aínda máis, ao aire libre”.
Segundo o PP, o barco está agora varado en terra sobre o remolque no que foi trasladado ao recinto de Begonte, no que a Deputación Provincial ten dúas naves nas que “non colle” o transporte.
O deputado popular Óscar Poy xa incidiu durante o pleno do pasado 31 de decembro no feito de que non haxa un espazo para o catamarán, Pelegrín I. Así, recalcou que “a isto se lle chama previsión”, como a que fixo que o barco “pasase dous anos no río sen apenas mantemento, sen ningún uso e acabase afundindo”.
No pleno, o representante tamén sinalou que “haberá que ver onde o deixan cando a empresa que se encargou do traslado decida que xa é hora de recuperar o remolque” sobre o que se atopa o catamarán.
Por último, o deputado considera que o barco afundido é “unha clara mostra de como entende a xestión do diñeiro público” o goberno do PSOE-BNG en Lugo.
