O que foi secretario xeral do PSdeG, José Ramón Gómez Besteiro, pediu a recusación da xuíza Pilar de Lara, instrutora da causa na que está imputado en relación á urbanización do Garañón, no parque Rosalía de Castro.
Así o confirmou o seu avogado Cándido Conde-Pumpido, quen explicou que a petición se fai en base ao artigo 219 da Lei Orgánica do Poder Xudicial e despois de que a maxistrada fose sancionada polo Consello Xeral do Poder Xudicial (CGPJ).
“É evidente que a sanción que lle impuxo a comisión disciplinaria do Consello Xeral do Poder Xudicial de sete meses e un día, por desatención, atrasos e investigacións prospectivas, é algo que vimos denunciando publicamente desde hai moito tempo, desde que se imputou a Besteiro”, manifestou.
O avogado lembrou que foi o día anterior a que se confirmase a sanción cando a maxistrada “dita un auto”. “É o único que fixo desde que se resolveu a sanción, pechando a investigación e imputando novos delitos a Besteiro que non se imputaban ao principio”, censurou.
Conde-Pumpido ve no fallo unha “vinganza cara aos políticos” que se produce ademais “en período preelectoral”, antes das eleccións xerais do 10 de novembro.
Respecto diso, o avogado explicou que debe ser a xuíza a que admita ou non a recusación aínda que a última palabra é a da Audiencia Provincial de Lugo. Ademais, tendo en conta unha recusación formulada con anterioridade, calcula que poida estar resolta en “torno aos dous ou tres meses”.
RECURSO
A xuíza Pilar de Lara ten de prazo ata o próximo 9 de decembro para recorrer ante o Tribunal Supremo a sanción imposta polo CGPJ. Así o confirmou o avogado da xuíza, Agustín Azparren, que precisou que a notificación desta sanción se produciu o pasado martes e, por tanto, o prazo para presentar recurso “seria de dous meses” desde o día seguinte, ata o 9 de decembro.
A defensa de Pilar de Lara lembrou que nese recurso de casación sería no que se pediría a medida cautelar de suspensión da execución da sanción, para evitar a perda de destino ata que se resolva.
Azparren precisou que a súa intención é “esgotar” o prazo de dous meses. “O normal é esgotalo”, subliñou, á vez que aclarou que se se pide suspensión de execución do castigo isto podería resolverse a principios do ano que vén, “estariamos a falar de xaneiro”, finalizou.
