Os populares de Lugo reclaman ao goberno local “un compromiso” para mellorar en índices de transparencia e acceso á información pública, xa que aseguran que a cidade é “a capital de provincia galega menos transparente” e que “incumpre os indicadores de plataformas internacionais”.
Segundo o PP de Lugo, os datos da entidade Dyntra revelan “a necesidade de que o goberno se centre e traballe con intensidade” para sacar a Lugo do posto 37 das 50 capitais de provincia analizadas con menos transparencia de España.
Ademais, segundo informou o grupo nun comunicado este domingo, a cidade incumpre 81 dos 162 indicadores que Dyntra analizou para avaliar a planificación, organización e o grao de compromiso coa cidadanía, entre outros.
“Aquí sobran boas palabras” e necesítase “vontade política”, sentenciou o PP, que insta ao á administración local a “crear unha orde” en materia de transparencia e un “novo órgano de participación directa” que celebre reunións mensuais abertas aos cidadáns.
En concreto, os populares suxiren a constitución dun Comité de Participación Cidadá e de Calidade de servizos nos que se convide a representantes veciñais para “fiscalizar os acordos” aos que se cheguen.
