A Xunta de Goberno da Deputación aprobou este venres a adxudicación do subministro de doce vehículos para o Parque Móbil. Trátase de nove turismos e tres ‘todocamiños’ que renovarán unha flota xa “obsoleta”, con vehículos de máis de 10 anos e algúns con máis de 300.000 quilómetros. O prezo total superaría os 200.000€, pero a empresa aboará preto de 19.000€ á entidade provincial pola entrega de doce coches usados. Así pois, o investimento final será de case 181.800 euros.
Segundo explicou a voceira socialista na Deputación, Pilar García Porto, o obxectivo é ofrecer “un servizo máis eficiente e de calidade á cidadanía”, posto que estes vehículos van destinados aos traballos de vixilancia e mantemento da rede provincial. Estas novas incorporacións súmanse aos outros cinco coches adquiridos este ano, neste caso eléctricos.
DESBROCES
Outra cuestión que se tratou na Xunta de Goberno deste venres foi a adxudicación do lote de desbroces correspondente ás estradas provinciais do Incio, Triacastela e Samos. A compañía que acometerá os traballos é Excavaciones Goni SL e o importe ascende a 71.123€ para as dúas anualidades que abrangue o contrato.
Así, a día de hoxe, quedarían tres lotes por adxudicar: Mondoñedo e Abadín (porque falta concluír o proceso de contratación); e Negueira de Muñiz, Navia de Suarna, Bóveda, A Pobra do Brollón e Monforte de Lemos (por un atraso no procedemento, logo de renunciar a empresa adxudicataria).
REMANENTES PLAN ÚNICO
Por outra banda, quedou aprobada a solicitude dos concellos de Baleira, Friol, Ourol e Xermade de destinar a novas obras os remanantes resultantes tras adxudicar as actuacións financiadas co Plan Único 2018. O conxunto do remanente alcanza os 90.000 €.
En Baleira empregarán ese diñeiro para mellorar o vial entre San Román e Retizós; en Friol repararase o pavimento no camiño de acceso a Guldriz de Arriba. Á súa vez, no Ourol construiranse badéns redutores de velocidade en Merille e faranse labores de mantemento nos accesos de Burgás, Cernado, Ourol e Pousadoiro-Folgoso. Por último, o concello de Xermade aproveitará para substituír equipos de alumeado.
