A xunta de goberno local do Concello de Lugo quedou constituída este xoves con cinco edís do PSOE e tres do BNG, no marco do bipartito que estará á fronte do Consistorio esta lexislatura.

Nunha rolda de prensa conxunta na sala de novas tecnoloxías, o portavoz do PSOE no Concello de Lugo, Miguel Fernández, e o primeiro tenente de alcalde, o nacionalista Rubén Arroxo, destacaron as “boas formas” do novo executivo.

Pola súa banda, este venres, 5 de xullo, celebrarase o pleno de organización -a partir das 10,00 horas- para fixar que os plenos sexan os xoves, tamén ás 10,00 horas. Así mesmo, as comisións de goberno mantéñense os mércores.

“Comeza un novo período no cal este goberno de coalición vai buscar o mellor para Lugo. Hai unha gran vontade e unha gran ilusión tanto por parte do PSOE como do BNG. Anunciamos un novo período, hoxe foi basicamente unha xunta de goberno de constitución para aprobar os temas que viñan de atrás”, explicou Rubén Arroxo.

Por parte dos socialistas, Miguel Fernández concretou que “o primeiro punto foi dar por constituída a xunta de goberno”, mentres no segundo punto aprobáronse un total de dez licencias urbanísticas. Entre elas, o Concello autoriza un campamento turístico con cinco cabanas, que se vai a instalar na parroquia de Veral.