O secretario de Organización do PSdeG, José Antonio Quiroga, será o encargado de dirixir o partido en Lugo ata a elección dunha nova executiva provincial tras a dimisión este luns do secretario provincial, Álvaro Santos.
Quiroga manifestou o seu respecto ante unha decisión “persoal” e agradeceu a Santos o traballo do último e medio. Ademais, desexoulle éxitos na súa tarefa como edil do Concello de Lugo.
Así mesmo, sinalou que, como consecuencia da renuncia, a dirección galega do PSdeG actuará con “total normalidade” dentro das competencias que lle atribúen os estatutos e constituirá unha xestora que estará pilotada por Quiroga.
De cara ao futuro, o secretario de Organización sinalou que nas últimas xornadas recibiu información dos distintos partidos xudiciais da provincia, na que a “inmensa maioría” de edís aposta por “unha etapa de fortalecemento e futuro no partido e na Deputación”.
En concreto, Santos presentou este luns a súa dimisión nunha rolda de prensa na que recoñeceu non ter “boa sintonía” coa dirección galega do partido. Precisamente, as desavinzas coa executiva galega que encabeza Gonzalo Caballero materializáronse nun conflito pola presidencia da Deputación de Lugo. Así, mentres Santos apoia que o alcalde da Pontenova, Darío Campos, siga á fronte da Deputación, outros sectores do partido apoian para o posto o alcalde de Monforte, José Tomei.
“FORTALEZA” DO PSDEG
Quiroga destacou o “perfecto funcionamento e a fortaleza” do PSdeG que, en “plena sintonía” cos órganos federais, seguirá traballando cunha “nova maioría social en Galicia”.
Por último, o secretario de Organización sinalou que, despois dos “éxitos electorais” nas últimas eleccións, “é o tempo de apostas colectivas”, en coordinación coas direccións galega e federal do partido para dar ao país “o impulso que necesita”.
Álvaro Santos dimite como secretario provincial do PSOE en Lugo
