O ex-presidente do Goberno Mariano Rajoy visitou este venres Lugo, nun acto de campaña electoral deseñado como un paseo polo centro histórico da cidade, para dar o seu apoio ao candidato á Alcaldía Ramón Carballo, a quen destacou como unha persoa “seria, formal” e “na que se pode confiar”. “Isto é o que se lle debe pedir a un político. Oxalá houbese moitos Ramón Carballo por aí adiante”, dixo.
No paseo tamén participou o presidente da Xunta, Alberto Núñez Feijóo, quen dixo que Carballo é “probablemente o candidato que lle gustaría ter a todos os partidos” que se presentan no municipio, e apelou a “abrir un período novo, de cambio” fronte aos 20 anos que levan os socialistas co bastón de mando.
“Só hai dúas posibilidades de goberno: ou un dividido entre socialistas, nacionalistas e Podemos; ou un goberno unido ante un programa concreto e un candidato magnífico”, abundou, para despois agradecer ao ex-presidente Rajoy a súa participación nesta campaña como alguén “que segue defendendo e militando” no PP
Ramón Carballo agradeceu a ambos a súa presenza e afirmou que esta visita do “mellor presidente do Goberno” –Rajoy– e do “mellor presidente que hai en España” –Feijóo– vai servir para dar “o empuxón” que lles falta aos populares para chegar ao goberno local.
PERCORRIDO POLO CENTRO HISTÓRICO
Todas estas declaracións producíronse durante unha pausa do percorrido que fixeron polo centro histórico, no que decenas de persoas se amosaron sorprendidas por ver a Rajoy e a Feijóo polas rúas e ata lles pararon para pedirlles fotos. “Que alegría velo”, exclamou unha señora que se achegou ao expresidente.
O paseo iniciouse na pequena carpa situada xunto á Praza de Abastos, onde ata unha curiosa con ‘merchandising’ electoral do PSOE se parou a falar con Rajoy.
Unha das imaxes máis orixinais do percorrido foi ver á comitiva popular pasando preto do posto de propaganda do PSOE e tamén do de Esquerda Unida (EU) e Equo.
Tamén Feijóo acaparou parte do protagonismo dos viandantes e non dubidou en sacarse fotografías cos que así llo pediron. Unha señora chegou a preguntarlle a Rajoy sobre o futuro do líder galego: “Vano levar para Madrid? É o bo que temos en Galicia, vano levar?”.
Rajoy estivo case todo o paseo saudando riseiro a todo aquel que se lle cruzou. “Eu non pensaba que era tan alto”, escoitouse por parte dos que se pararon.
Cara ao final do paseo, Rajoy e Feijóo pousaron na Praza Maior, fronte ao Concello, para sacar a foto de familia da candidatura que este domingo buscará gobernar a urbe durante o próximos catro anos.
