O deputado non adscrito na Deputación de Lugo e presidente de Suplusa, Manuel Martínez, insiste en politizar as residencias abertas pola Deputación de Lugo a pesar da recente setenza do xulgado do Contencioso Administrativo número dous de Lugo que desestimou a petición do PP e do propio Martínez, de paralizar de forma inmediata a apertura das residencias de Pol e a Fonsagrada, que promove a Deputación de Lugo.

Así, este deputado continuou coa polémica que mantén co goberno provincial respecto da apertura de residencias de maiores, advertindo de que continuará presentando denuncias ante o xulgado e a Xunta polo impulso “ilegal” que planea o organismo presidido por Darío Campos

Neste sentido, sinalou o caso da residencia de Trabada, “a única” que está aberta de momento, e que desde o punto de vista xurídico é “totalmente ilegal”.  “Non ten o PIA, nin a Deputación, nin o Concello, o PIA teno SUPLUSA que era a única que a podía abrir. Non ten os protocolos de actuación dunha residencia normal, están a actuar con persoal contratado pola propia Deputación e ignorando o que se contratou aquí (a través de SUPLUSA) e non sabemos o que pode pasar”, precisou.

Martínez insistiu con que volverá presentar “denuncia no xulgado e ante a Xunta para que actúe contra estes ocupas das residencias”, aínda que non recorrerá o auto do Contencioso Administrativo que desestimou a paralización da apertura de Pol e A Fonsagrada.