A plantilla municipal de bombeiros de Lugo manifestarase e recollerá firmas en protesta pola precariedade do corpo. Así o anunciaron membros do Servizo de Prevención, Extinción de Incendios e Salvamento do Concello en rolda de prensa, alertando da situación límite no número de efectivos, que impide atender “dous sinistros á vez”.
Hogano hai 37 traballadores en plantel. Este número supón unha reducción de case un terzo con respecto a 2002, como detallou o delegado de Comisións Obreiras no parque de bombeiros, Tino Vila. A situación agrávase polas cinco xubilacións previstas neste ano, e a ausencia de xefatura dende 2015, circunstancia que obriga a que o membro do corpo con máis experiencia asuma o liderado en cada quenda.
No corpo insisten na necesidade de alomenos oito bombeiros por quenda, esixencia “que a alcaldesa non aceptou, decretando un mínimo de seis”. Os profesionais do servizo de extinción explican que a plantilla decidiu realizar servizos extraordinarios voluntarios para manter o servizo operativo mentres continuasen prazas vacantes.
Risco para a cidadanía e os profesionais
“Faremos todo o posible cos medios humanos dispoñibles para manter a operatividade do servizo”. Así e todo, instan o Concello a “garantir a seguridade da cidade e dos propios bombeiros”, advertindo de que “reducir a cantidade de participantes nunha intervención aumenta o risco”. “A día de hoxe é imposible cubrir dous sinistros á vez”.
Os membros do plantel comparan a situación do corpo municipal coa traxedia de Badalona. “A ese lume acudiron once bombeiros e un reforzo de vinte e un bombeiros de Barcelona”, algo que non evitou un balance de varios mortos e ducias de feridos. “E está lonxe do número que podería saír se pasase algo semellante en Lugo”, advirten.
Pola súa banda, o representante de CCOO acusou os responsables municipais de “neglixencia” e pediu cubrir con urxencia as vacantes con ofertas de emprego público. “A falta de organización e recursos supón un altísimo risco para a cidadanía e os propios profesionais”, lamentou Vila. Así, anunciou concentracións e recollidas de firmas contra a “irresponsabilidade” do goberno local.
