Unhas setenta persoas activistas de todo España iniciaron unha folga de fame o pasado mércores para esixir avances na aprobación da Lei Trans no Congreso dos Deputados. Derek Alexander, un rapaz trans de 24 anos que vive en Lugo, é un deles.
“Eu son home, pero xa nacín sendo home. Os xenitais non me definían”, di Derek para explicar a súa identidade de xénero, que non cadra co sexo que aínda figura no seu DNI. El axiña comezará os trámites para mudar o seu nome a efectos legais, un procedemento que precisamente sería máis doado e áxil no caso de que a Lei Trans saíse adiante.
Actualmente requírese un informe médico e un procedemento psiquiátrico que pode atrasar o paso ata dous anos. O borrador da Lei Trans recolle cambios neste aspecto, pero tamén alude aos dereitos das persoas trans ou non binarias para xestar ou abortar.
O documento presentado por Unidas Podemos no Congreso está actualmente paralizado por diverxencias no propio Goberno. O desbloqueo desta proposta e o seu rexistro como preposición de lei é xustamente o que pretenden conseguir estas 70 persoas que comezaron a folga de fame (persoas do colectivo, pero tamén familiares ou achegados).
“Non me vou render. Seguiremos ata o final”, afirmaba Derek nunha entrevista na Radio Galega, na que tamén engadía que a súa parella está apoiando a causa coa súa propia folga de fame. “Isto é algo para os que veñen detrás, non só para nós“, remataba.
