A Dirección Xeral de Emerxencias e Interior, da Consellería de Presidencia, Xustiza e Deportes, activou para esta tarde de sábado a alerta laranxa por treboadas no centro e na montaña de Lugo.
Tal e como trasladou o Goberno galego en nota de prensa, informouse a través do 112 Galicia aos municipios da provincia afectada, á deputación, servizo provincial e agrupacións de voluntario de Protección Civil e aos clubs náuticos, entre outros, co fin de garantir a seguridade.
Segundo a Axencia Estatal de Meteoroloxía (Aemet), esta alerta laranxa deixará treboadas que poderán ir acompañadas de ventos fortes e choivas.
Por iso, recoméndase circular con precaución e informarse antes do estado das estradas, non atravesar zonas alagadas ou que poidan chegar a alagarse e non aparcar nas marxes dos ríos.
