A Xunta de Galicia activou para este xoves a alerta laranxa por precipitacións con acumulacións de 30 mm nunha hora no centro e na zona de montaña de Lugo.
Co obxectivo de garantir a seguridade das persoas e dos bens, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos das provincias afectadas; ás deputacións; aos servizos provinciais e ás agrupacións de voluntarios de Protección Civil, así como aos clubs náuticos, entre outros.
Segundo a Axencia Estatal de Meteoroloxía (Aemet), a alerta laranxa activarase este xoves a primeiras horas da tarde no centro e na zona de montaña de Lugo por precipitacións con acumulacións de 30 mm nunha hora.
A Secretaría Xeral para o Deporte da Consellería de Presidencia, Xustiza e Deportes acordou a suspensión da actividade deportiva federada ao aire libre, agás nos deportes náuticos e acuáticos federados, nas zonas afectadas pola alerta laranxa.
Os concellos afectados e os horarios de vixencia da alerta poden consultarse na web Deporte Galego. Ante as choivas intensas recoméndase circular con precaución e informarse antes do estado das estradas, non atravesar zonas anegadas ou que poidan chegar a anegarse e non aparcar nas ribeiras dos ríos.
