Descubrindo o Camiño Primitivo é o nome do proxecto que espallará a importancia da ruta de peregrinaxe de cara ao Xacobeo 2021. O Concello de Lugo aspira a contar con 49.000 euros da Xunta de Galicia, como previu o goberno galego, para a celebración dun congreso internacional, deseñar un soporte dixital e accións culturais arredor deste ben Patrimonio da Humanidade.
Participan da iniciativa os concellos de Castroverde, Baleira e a Fonsagrada, ademais de distintas asociacións sen ánimos de lugro e grupos de estudo e investigación. Dentro do terceiro sector, serán colaboradoras ONCE, COGAMI, Auxilia, a Asociación de Amigos do Camiño de Santiago na provincia de Lugo, Asociación cultural Promoción de Arte Urbanas; e no eido da investigación, o Centro de Estudos da Cidade e os grupos de investigación GI-1907 IACOBUS E GI-2162 Atalaia, da Universidade de Santiago de Compostela.
Ademais da representación institucional da provincia no bienal Fairway, Forum do Camiño, o goberno local quere contar cun soporte dinámico co que situar o Camiño Primitivo como opción diferencial no vindeiro ano santo. Procura así valorizar e coidar un itinerario deturpado pola Axencia Galega de Turismo, a través da investigación, difusión, dinamización cultural e gastronómica.
O programa inclúe a celebración dun congreso internacional: Descubrindo o Camiño Primitivo: Retos, obxectivos e fortalezas cara o 2021. Contará con relatores e mesas de traballo no que abordar os elementos constitutivos da paisaxe cultural. A previsión de participación é de 18 relatores e uns 100 congresistas.
A maiores, Descubrindo o Camiño Primitivo propiciará a implicación da comunidade educativa a través da elaboración de materiais didácticos e da organización de charlas informativas nos centros educativos; así como a interacción cas e cos peregrinos. E contempla asemade o emprego das novas tecnoloxías para a divulgación, e intervencións creativas de arte urbano no tecido degradado na contorna da ruta primixenia, con solucións de calidade e estética.
Ricardo Polín: “No Camiño Primitivo prima a visión comercial sobre a identidade”
