A borrasca Caetano, que este xoves obrigou a activar diferentes alertas laranxa e amarela en Galicia, deixou ventos de 133,5 quilómetros por hora en Penedo do Galo, no municipio de Viveiro, así como choivas acumuladas de 62 litros por metro cadrado en Abadín.

Segundo informa Meteogalicia, pola tarde o vento vai amainando, pero a choiva cae con persistencia nas provincias da Coruña e Lugo –mantense ata a noite o aviso amarelo por acumulación de auga–.

Pola súa banda, Punta Candieira, no municipio de Cedeira, tamén se superaron os 100 quilómetros por hora (113,1 km/h). Mentres, preto dos 60 litros por metro cadrado acumulados está o municipio de Monfero.

Con todo, para a xornada do venres prevese un día moi diferente, xa que será seco e con pouco vento, segundo a previsión Meteogalicia.