Ecoloxistas en Acción e outros colectivos presentaron alegacións fronte a concesión do cuarto permiso de investigación mineiro de ouro solicitado pola empresa canadense Western Metallica no concello asturiano de Ibias, a apenas 150 metros do límite co concello galego de Navia de Suarna e do Lugar de Importancia Comunitaria Os Ancares – O Courel.

As organizacións ecoloxistas de Asturias e Galicia denuncian que a Dirección Xeral de Minaría do Principado concedera o permiso de investigación sen unha avaliación de impacto ambiental que é obrigatoria cando a actividade poida causar impactos directos ou indirectos sobre espazos protexidos, coma é o caso. Tamén denuncian a documentación presentada pola empresa que omite a existencia dos espazos protexidos e non estabelece ningunha medida para minimizar impactos.

Como exemplo, para mostrar o impacto real de proxectos similares, Ecoloxistas en acción explica que a compañía canadense Rio Narcea Gold Mines obtivo na mina de El Valle-Boinás apenas 27 toneladas de ouro nunha década, provocando a contaminación do río Cauxa con arsénico, selenio, cobre e outros metais pesados.