O servizo municipal de limpeza viaria e recollida de lixo de Lugo contará dende hoxe cunha ducia de triciclos eléctricos que, se ben se empregarán de forma permanente nos dispositivos ordinarios de traballo, estes días permitirán xa ao persoal intensificar o baleirado de papeleiras do centro da cidade durante as festas patronais do San Froilán.

A rexedora de Lugo, Lara Méndez, e o concelleiro de Medio Ambiente, Miguel Fernández, estiveron presentes na entrega destes novos equipamentos cos que se pretende exercer unha supervisión continua do estado no que se atopan as zonas nas que se agarda unha maior aforo e concentración de actividades polo San Froilán.

“Os vehículos, denominados ‘eTrike’, dispoñen dunha autonomía de até 65 km e inclúen un caixón traseiro con capacidade para 90 litros o que posibilitará levar a cabo un mantemento áxil e continuado de zonas específicas”, explicou o tenente de alcaldesa.

Miguel Fernández lembrou, igualmente, que estes triciclos poderán ser cargados nos diferentes cuarteliños que se están habilitando na capital. Instalacións onde as brigadas que asumen as tarefas de aseo da cidade poden organizarse antes de iniciar a súa quenda.