Os ecoloxistas de Adega volveron a pedir ao Concello de Lugo que paralice as obras en Carril das Flores xa que, segundo denuncian, afecta a dous bens Patrimonio da Humanidade, como son a Muralla Romana e o Camiño Primitivo ao seu paso pola cidade.

A asociación ecoloxista explicou que os traballos contan coa aprobación do concello e que tamén afectan a unha pasarela que une a rúa San Roque coa Rolda da Muralla, no que foi no seu momento unha solución provisional hai máis de 40 anos e que non se viu corrixida ata agora.

Un dos portavoces de Adega, Froilán Pallín, precisou que este martes se lle presentou un escrito á alcaldesa, Lara Méndez, “para que paralice isto porque non é legal”. Pallín debullou que “aí non hai unha licenza de edificación, nin proxecto e o Pepri desa esquina de facto modifica o Plan Xeral de Ordenación Municipal e, por tanto, non respecta a legalidade”.

“É unha zona onde conflúen dúas zonas que son espazos que son Patrimonio da Humanidade, como a muralla e o camiño primitivo. É un despropósito e pretendemos pola vía legal non permitir unha barbaridade deste tipo“, engadiu. Adega xa presentou un recurso de casación ante o Tribunal Supremo por estas obras, que esperan que se resolva favorablemente aínda que non descartan ir pola vía penal para lograr frear estes traballos.