A guía ‘Lugo Románico’ –impulsada pola Deputación de Lugo— recollerá en catro tomos a riqueza do románico na provincia co obxectivo de dar a coñecer e pór en valor este patrimonio.
O presidente da Deputación, José Tomé, presentou este martes na igrexa de Santa María de Nogueira de Miño, en Chantada, o primeiro volume da guía, que conta con información e fotografías deste estilo arquitectónico en 11 concellos.
Respecto diso, o presidente provincial valorou o románico como “un sinal de identidade e un poderoso reclamo turístico ao redor do que articular unha oferta de calidade, sustentable, non masificada e de experiencias”.
Miguel Mendoza, en colaboración con outros autores, foi o encargado de elaborar os textos da guía sobre a Ribeira Sacra, que ilustran fotografías de Pepe Tejero e Roberto Díaz.
