O colectivo Patrimonio dos Ancares vén de documentar dúas novas mámoas no concello de Becerreá grazas á información facilitada por unha veciña. Atópanse na serra de San Pedro, na parroquia de Cascallá, a 795 metros de altitude e próximas a unha ruta sinalizada entre as aldeas de Todón e San Pedro.

Segundo explica a asocaiación, a primeira das mámoas ten unhas medidas de 18 metros de diámetro e unha altura de 0,80 metros. Sobre o túmulo hai gran cantidade de pedras de lousa e cuarzo que formaban parte da coiraza que o recubría. Entre a maleza vense dúas pedras de considerables dimensións que puideron formar parte do dolmen que agochaba no seu interior.

A segunda medoña, de menores dimensións, ten un diámetro de 12 metros e unha altura de 0,30 metros, perdendo gran parte da masa tumular ao ampliar un camiño. A súa antigüidade ronda os 6.000 anos.

Segundo informacións, nesta penichaira podería haber, polo menos, outras tres mámoas que foron destruídas hai décadas polos labores agrícolas e forestais.

Por outra parte, Patrimonio dos Ancares informa de que outras catro mámoas localizadas no concello (tres no Monte Brueiras, na parroquia de Guilfrei, e outra máis na Pena de Leira, en Ferreirós de Valboa) xa foron catalagodas polo Servizo de Xestión Cultural da Consellería de Cultura. O achado da mámoa de Pena de Leira foi posible grazas á documentación antiga dos Interrogatorios do Catastro de Ensenada levados a cabo no ano 1752.