O colectivo Patrimonio dos Ancares vén de documentar dúas novas mámoas nos concellos de Becerreá e Navia de Suarna, unha delas grazas á información procedente de documentación antiga.
A primeira das mámoas foi localizada na Pena da Leira, na parroquia becerrega de Ferreirós de Valboa. Atópase a 850 metros de altitude, a carón do antigo camiño que comunicaba as aldeas de A Fonte do Lobo e Guillén. Coincide, entón, cunha referencia que figura nos Interrogatorios do Catastro de Ensenada celebrados o día 5 de outubro de 1752, onde se fala da Medorra da Pedra da Leira como marco divisorio entre as citadas parroquias.
Segundo os datos de Patrimonio dos Ancares, trátase dun túmulo de 17 metros de diámetro e 1,5 metros de altura. Está parcialmente cuberto de xestas e, nun dos lados, pódense ver unhas rodeiras de tractor. Espalladas pola mámoa vense pequenas pedras de lousa que, segundo explican, puideron formar parte da coiraza que a recubría.
NAVIA DE SUARNA
A segunda mámoa foi documentada no Monte do Igrexario, na parroquia de Galegos, concello de Navia de Suarna, a unha altitude de 675 metros. Neste caso, ten uns 19 metros de diámetro e 1,30 metros de altura e está atravesado por dúas gabias pouco profundas, produto dunha recente plantación de pinos.
No centro apréciase un cráter de violación, moi colmatado, cun diámetro aproximado de 1,5 metros. Nas inmediacións do túmulo atópanse tres pedras, a maior de 1,25 metros de longo, que, por información recollida dun veciño, formaban parte da cámara funeraria.
Os achados xa foron comunicados á Xunta de Galicia para que procedan á súa catalogación.
