O Ministerio de Transportes, Mobilidade e Axenda Urbana (Mitma) licitou as obras de rehabilitación interior do Pazo do Xeneral Paredes (Portomarín) por un importe de 173.729 euros. Segundo informou o Goberno nunha nota de prensa, os traballos iniciaranse previsiblemente no outono deste ano, cun prazo de execución de seis meses.
O Pazo do Xeneral Paredes, ou Casa do Conde da Maza, foi propiedade do Conde de Taboada, tamén coñecido como Da Maza, descendente dunha “antiga e dilatada dinastía de militares”, explica o Executivo central. O Concello de Portomarín busca agora pór en uso este pazo, datado do século XVI, para habilitalo como centro sociocultural no que os veciños poidan realizar distintas actividades.
Coas obras que se licitan, abordaranse traballos de demolición de tabiquerías para adaptar a distribución interior ao uso público sociocultural, turístico e deportivo que se require. Para iso, crearanse novas estancias, renovaranse chans, teitos e paredes, así como a carpintaría interior, e instalarase un ascensor e ramplas, ademais de crear vestiarios e aseos adaptados e renovar a instalación eléctrica, a calefacción e a fontanaría.
Esta actuación realízase no marco do Programa de Rehabilitación do Patrimonio Arquitectónico do Ministerio, que consiste na execución de obras relevantes de rehabilitación do patrimonio arquitectónico español e dotación de equipamentos públicos cos orzamentos propios.
