A Consellería do Medio Rural pon en marcha este ano plans piloto en catro dos 19 distritos forestais existentes co fin de impulsar tarefas de prevención antiicendios que se centren en zonas de especial abandono e afectación polo lume. No caso da provincia de Lugo, o distrito elixido será o da Terra de Lemos (VIII).
Alí haberá cinco obras preventivas en perímetros de alto risco nos municipios de Bóveda, O Saviñao e Quiroga. Tamén haberá rozas en Chantada e Pobra do Brollón, entre outros. En total, faranse unha decena de queimas controladas en 57 hectáreas.
No conxunto da comunidade galega, a intervención afectará a preto de 630 hectáreas nun primeiro momento, aínda que a Consellería baralla a idea de estender esta práctica aos 19 distritos máis adiante. Rozas, devasas, eliminación de eucaliptos e piñeiros de marxes de estradas e melloras de pistas serán algúns dos traballos.
PROTOCOLO FRONTE AO CORONAVIRUS
Asemade, a Xunta trasladou un protocolo aos traballadores de prevención fronte ao coronavirus —ao que os sindicatos presentaron alegacións— no que se recolle que “se debe actuar sempre que sexa posible mantendo a distancia mínima de seguridade de dous metros”.
Aínda que os sindicatos reclamaron que se fixesen probas PCR de forma masiva entre os traballadores do servizo antiincendios, a Xunta fixa neste protocolo que só se realizarán cando un empregado “manifeste síntomas compatibles coa COVID-19“.
