A alcaldesa de Lugo, Lara Méndez, anunciou este martes en rolda de prensa o “inicio do proceso de licitación do primeiro edificio verde” da cidade, que se emprazará no barrio ecolóxico que se deseña na zona de Garabolos. O orzamento da obra, pendente de aprobación este mércores en xunta de goberno, alcanza os 1.040.000 euros.

Acompañada de técnicos que participaron no proxecto, un deles o profesor da Universidade Politécnica de Madrid Luís Ruíz, afirmou que, con iso, “Lugo sitúase á vangarda” de España en “construción sustentable, baseada na madeira“.  Sitúa á cidade “no mapa na construción sustentable a nivel europeo”.

Méndez incidiu en que este “será o primeiro edificio pioneiro e innovador que se enmarca dentro do programa ‘Lugo máis biodinámico’ para deseñar as cidades ecolóxicas do futuro”. “Nós queremos que sexa xa o noso presente“, engadiu.

A rexedora puntualizou que “supón un novo modelo construtivo en altura que será realizado na súa totalidade con estrutura de madeira local, de madeira galega“. “Vai supor unha revolución en canto á construción urbana con recursos naturais coa finalidade de minimizar o impacto medio ambiental”, asegurou.

ORZAMENTO

Ademais, este edificio autoabastecerase de enerxía e reducirá a emisión de monóxido de carbono. Segundo explicaron, trátase dunha construción de 677 metros cadrados, de catro plantas, que albergará oficinas municipais, ademais de aulas de formación ou espazos onde se poderán establecer empresas relacionadas coa loita contra o cambio climático.

O orzamento da obra, que se aprobará este mércores en xunta de goberno, ascende a 1.040.000 euros, con achega tamén da Deputación provincial. Así, prevese un edificio “bioclimático”, sinalaron, con produción fotovoltaica e no que se aproveiten as enerxías do sol e do vento, ademais de implementar un sistema para a recuperación da calor por ventilación.