A Consellería de Cultura e Turismo licitou os traballos de reparación, restauración e conservación preventiva da igrexa de San Nicolás de Portomarín, cun orzamento de 226.590 euros.

O delegado territorial da Xunta, José Manuel Balseiro, visitou hoxe o templo para coñecer en detalle as actuacións. O obxectivo é resolver os problemas provocados pola filtración de humidades, polo que as melloras se centrarán nas cubertas e nos paramentos. Balseiro explicou que o prazo máximo de execución das obras será de seis meses, e as empresas interesadas en concorrer á licitación teñen de prazo ata o día 12 de agosto para presentar ofertas.

A intervención corrixirá a entrada de humidade que se produce a través das cubertas e os sistemas de evacuación das augas de chuvia, encontros coas torres e paseos de ronda xunto as ameas, así como as alteracións que como consecuencia desta situación poidan acusar as fachadas, en especial as portadas escultóricas.

Ademais, os traballos eliminarán a colonización biolóxica e outras patoloxías presentes nas fachadas e nos vitrais dos rosetóns, ademias de mellorar as instalacións de iluminación e ventilación do espazo baixo cuberta, entre outras actuacións. A obra está cofinanciada polo Fondo Europeo de Desenvolvemento Rexional no marco do programa operativo Feder Galicia 2014-2020.

BEN DE INTERESE CULTURAL

Balseiro lembrou que a igrexa de Portomarín é un dos monumentos significativos do Camiño Francés e “a Xunta está a traballar na posta a punto do patrimonio no marco dos obxectivos do Plan Estratéxico do Xacobeo 21”.

A igrexa de San Nicolás ou de San Xoán de Portomarín ten a consideración de ben de interese cultural (BIC) coa categoría de monumento. Foi construída entre os séculos XII e XIII pola Orde Hospitalaria de San Xoán de Xerusalén, seguindo a tradición dos antigos templos romanos adicados ao deus Jano.