Un home resultou ferido de consideración na mañá deste mércores despois de precipitarse dunha escaleira, desde unha altura de catro metros, no municipio de Portomarín.
Segundo informou o 112 Galicia, os feitos sucederon nunha panadaría situada na Avenida de Sarria, no termo municipal de Portomarín. O servizo de emerxencias tivo coñecemento deste accidente laboral a través dunha persoa ás 11,15 horas.
Tras iso, por parte do CIAE 112 Galicia pasouse aviso a Urxencias Sanitarias de Galicia-061, que mobilizou ata unha zona próxima ao lugar dos feitos un helicóptero medicalizado para atender ao home ferido.
Tamén, o persoal do 112 Galicia solicitou a intervención de axentes da Garda Civil e de Protección Civil de Portomarín, para colaborar co equipo médico desprazado na aeronave. Ademais, informou os feitos ao GES de Monterroso.
