O BNG rexistrou preguntas ante o Congreso para coñecer as actuacións do Goberno do Estado para mellorar a conexión a Internet na provincia de Lugo e garantir o acceso a Internet en zonas rurais, dentro do Programa de Universalización de Infraestruturas Dixitais para a Cohesión-Banda Ancha (ÚNICO-Banda Ancha).
O deputado do BNG no Congreso, Néstor Rego, sinalou que “fóra das cidades, en moitos concellos a conexión non chega aos 20MB reais”, o cal “dificulta a fixación da poboación e a implantación de moitas empresas”, apuntou. A formación nacionalista galega reclamou especial atención ao concello do Corgo, no que Rego denunciou que a veciñanza “non ten acceso á cobertura de telefonía móbil para facer chamadas, nin acceso a Internet, nin móbil nin fixo”.
Neste municipio, o BNG destacou pola súa “mala” cobertura aos núcleos de Queizán, Anseán, Adai, Piñeiro, Folgosa, a estrada de Laxosa, Maceda, Campelo, Farnadeiros, Gomeán, Quinte, Vilanova, Manán, Vilachá, Fonteita e A Pedra.
Por outra banda, Rego apuntou que, segundo a identificación de zonas brancas e grises do Ministerio de Asuntos Económicos e Transformación Dixital, o municipio do Corgo atópase nunha zona branca, o que implica que “non dispón de cobertura de redes de banda ancha de nova xeración nin previsións para a súa dotación no prazo de tres anos”, segundo explícase na páxina web do Ministerio.
Segundo sinalou o grupo político, o Programa de Universalización de Infraestruturas Dixitais para a Cohesión-Banda Ancha inclúe actuacións na provincia de Lugo que aparecen “en execución”, pero denuncian que “descoñecen” o seu alcance e pregúntanse “se os núcleos afectados gozarán dunha mellora na súa conexión”.
