A deputada do BNG Olalla Rodil comprometeuse coa veciñanza do Corgo a esixir no Parlamento galego a ampliación do polígono industrial do Corgo nunha superficie equivalente á que xa está construída. Os nacionalistas falan da necesidade de aumentar o parque empresarial nunhas 10 hectáreas pola súa zona norte para dar resposta ao seu “ritmo de crecemento, dos maiores en toda a provincia”.

O polígono industrial do Corgo “é un dos mellor situados en Lugo a nivel de infraestruturas viarias”, destacan, polo que a súa ampliación non debera sobrepasar “o prazo de 1 ou 2 anos”.

UNANIMIDADE PARA SOLICITAR UN PUNTO LIMPO

A maiores, os representantes do BNG salientan a importancia de crear un punto limpo no concello corgués para recoller, sen custo, todo tipo de residuos que non van nos colectores do lixo (mobles, móbiles, electrodomésticos, ordenadores, pilas e baterías…).

Así pois, o grupo nacionalista levou a pleno unha moción, aprobada por unanimidade, para instar á Xunta á construción deste espazo dentro da área do polígono industrial. “Está céntrico, está moi ben comunicado, estaría dotado con todos os servizos e non ocasionaría ningún impacto visual na contorna”, resaltan.