A portavoz adxunta do Grupo Municipal Socialista en Lugo, Ana González Abelleira, acusou á alcaldesa, Elena Candia, de manter bloqueado “deliberadamente” o pago de máis de 2,7 millóns de euros correspondentes a 542 facturas con obxectivo de “reservar eses recursos económicos para outros fins políticos”.
Segundo denunciou a socialista, o goberno local “négase a tramitar o procedemento administrativo previsto na normativa para levantar os reparos, realizar a correspondente imputación orzamentaria e proceder ao pago das facturas”.
No seu lugar, apuntou, “pretende trasladar esa responsabilidade ao Pleno” mediante unha proposición que tachou de “totalmente esteril” e que, ao seu xuízo, “non é máis que unha cortina de fume para evitar asumir unha decisión que a lei atribúe ao goberno municipal”.
“Candia está a se esconder detrás dos grupos políticos para non facer o que lle corresponde como alcaldesa. Pretende converter unha responsabilidade administrativa propia nun debate político para repartir o desgaste e evitar asumir as consecuencias da súa decisión”, censurou González Abelleira.
