Os deputados do Grupo Popular Raquel Arias e José Luís Novo avanzaron este luns que a cifra de persoas dependentes atendidas na provincia de Lugo supera xa as 17.500, “a pesar dos recortes de Pedro Sánchez”, e celebraron que “grazas ás achegas da Xunta, Galicia é unha das autonomías que mellor xestionan a dependencia”.
Os deputados populares acusaron ao presidente do Goberno de “abandonar aos dependentes galegos” e insistiron en que “o que ten que facer é pagar o 50% da factura da dependencia, tal como establece a lei, un compromiso que vén incumprindo sistematicamente”.
“Neste exercicio 2026, Galicia investiu en dependencia 885 millóns de euros, un 22,4% máis respecto ao ano anterior, e case catro veces máis que na época do bipartito. Esta é a realidade, fronte as promesas de Sánchez”, destacaron os deputados.
Doutra banda, nun recente encontro con persoas maiores do concello de Rábade, trasladaron os “múltiples beneficios” de iniciativas como o Carné +65, Benestar en Balnearios ou Xuntos polo Nadal, postas en marcha pola Consellería de Política Social e Igualdade, que “fomentan unha vellez activa e saudable” e “contribúen a mellorar o seu benestar”.
Ademais destes e outros programas deseñados a favor do envellecemento activo, lembraron que o Executivo galego conta coa Estratexia contra a Soidade non Desexada e a Estratexia contra o Edadismo, co obxectivo de “previr, detectar e actuar” ante estas problemáticas que poden xurdir ao chegar á vellez.
