O actual portavoz do BNG no Concello de Lugo, Rubén Arroxo, será o candidato dos nacionalistas á alcaldía da capital lucense nas municipais do 2027.
Segundo trasladou a formación, a súa candidatura, a única presentada, foi apoiada pola maioría da asemblea local, celebrada este mércores.
Arroxo agradeceu a confianza da militancia e afirmou que comeza a traballar “nun novo reto”: “conseguir que en 12 meses Lugo volva ter un goberno de progreso liderado polo BNG”.
“Desde o BNG aspiramos á alcaldía, é o mellor momento da historia para facelo”, augurou o exteniente de alcalde, que aproveitou para reivindicar o traballo desenvolvido polo Bloque durante o últimos sete anos no goberno municipal.
Para Arroxo, o PP foi “incapaz” de cuestionar “un só proxecto impulsado polo BNG durante estes anos”, o que mostra, na súa opinión, “a capacidade de xestión e de transformación do Bloque cando ten responsabilidades de goberno”.
Ademais, sinalou que a “inmensa maioría do traballo” realizado fixérono “escoitando aos veciños” e avanzou que o BNG “seguirá estando ao seu lado desde a oposición, coa mesma responsabilidade e coa mesma vontade de mellorar Lugo”.
“LUGO É MELLOR CON RUBÉN ARROXO”
Mentres, o Consello Local do BNG destacou que durante os últimos anos Arroxo “soubo imprimir á acción de goberno do BNG un perfil propio”, demostrando ter un proxecto “claro e distintivo” para o concello.
“Lugo é moito mellor con goberno do BNG; Lugo é moito mellor con Rubén Arroxo á fronte do noso proxecto. Un Rubén cargado de experiencia e ideas”, enxalzou a organización, asegurando que hoxe é “o candidato máis coñecido” froito do “contacto constante” cos veciños.
