‘Vos Andares’ é unha serie de viaxes sonoras creada por artistas de diferentes ámbitos coa que se pode percorrer Os Ancares a través de media ducia de audioguías. Esta iniciativa gañou o Premio Sound Walk September 2024, o que supón entrar en “o catálogo internacional dos mellores camiños sonoros do mundo”.
A proposta está impulsada por Fósforo Arte & Cultura xunto ao colectivo Galiza Emocional. Os capítulos están elaborados ao amparo do programa Territorio Cultura da Xunta de Galicia e co patrocinio da Deputación de Lugo. O seis audioitinerarios atópanse en galego, castelán e inglés.
Cada capítulo está centrado nos municipios lucenses de Cervantes, Navia de Suarna, As Nogais, Pedrafita, Becerreá e Baralla, cunha duración entre os 32 e os 47 minutos. Está dispoñible na rede de forma gratuíta a través da web www.osandares.com.
Iria Azevedo, Marcos PTT, Avelina Pérez, Clara Gayo, José Díaz e María Lado son os artistas creadores destes audios nos que se mestura documental con ficción para percorrer a historia, patrimonio e paisaxe. Ademais, cóntase coas voces dos veciños para rexistrar a memoria da zona.
A perspectiva ecolóxica ten “unha presenza transversal ao transmitirse reflexións sobre a urxencia na protección da enorme biodiversidade deste territorio e sobre os efectos irreparable do despoboamento no espazo”.
